«Ата – бәйтерек, бала – жапырақ»

«Ата – бәйтерек, бала – жапырақ»

М.И.Сауханова, №10 "Балапан" бөбекжайының тәрбиешісі

Орал қаласы

Мақсаты: Балалардың бойына халқымыздың асыл қасиеттерін сіңіру, үлкенді сыйлау, өз ата-бабасын ұмытпай естеріне сақтау үшін және салт-дәстүрден нәр алып өсуіне, инабаттылыққа, жақсы мен жаманды ажырата білуге, аталы сөзден ғибрат алуға тәрбиелеу.

Әдіс-тәсілдер: сұрақ- жауап, көрсету, түсіндіру.

Алдын-ала жүргізілетін жұмыстар: суреттермен жұмыс.

Қажетті көрнекі құралдар: Ата мен әженің суреттері,отбасы суреті,слайд, үлестіомелі материалдар.

Қостілділік компонент: ата-дедушка, әже-бабушка, қарттар-старики, отбасы-семья.

Мотивациялық-қозғаушы кезең:

Шаттық шеңбері

Көтеріліп шаңырақ,

Уықтары шаншылар.

Керегелер керіліп,

Өрімдей боп өрілер.

Бәріміз жүрсек айналып,

Киіз үй болып көрінер.

(шаттық шеңберін орындайды)

Ұйымдастырушылық- ізденіс кезеңі:

Тәрбиеші: -Балалар, 1-қазан «Халықаралық қарттар күні» деп белгіленген. Осы мерекемен сіздердің аталарыңыз бен әжелеріңізді құттықтаймыз. Қарт адамдарды мадақтап, оларды ешқашан естен шығармау біздің міндетіміз.

-Қане, кім айтады ата мен әже деген кімдер?

Балалар: Олар отбасы мүшелері. Отбасындағы ең үлкен адамдар.

Тәрбиеші: -Тамаша, дұрыс айтасыңдар, ата-әже туралы қандай өлең жолдарын білеміз екен?

Балалар:

Құттықтаймыз мейрамыңмен аталар!

Әр күлгенің бізге бақыт саналар,

Еңбегіңді еш етпейтін өмірде,

Елің, жұртың, ұл мен қызың бағалар.

Әже мейір күн көзімен пара-пар,

Тұла бойға қуат болып таралар.

Өміріме шуақ шашып әрқашан,

Көп жасаңдар аталар мен әжелер.

Тәрбиеші: -Балалар, мен қазір сіздерге жұмбақ жасырайын, жауабын тауып көріңіздерші?

Жұмбақ:

Онсыз қызық жоқ маған,

Онсыз бақыт жоқ маған.

Ол баланың панасы,

Ол не екен балалар? (Отбасы)

Қостілділік компонент: ата-дедушка, әже-бабушка, қарттар-старики, отбасы-семья.

(балалар тәрбиешімен бірге сөздерді қайталайды)

Тәрбиеші: - Дұрыс жұмбақтың шешуі отбасы екен. Олай болса бәріміз тақтаға назар аударайықшы. Бұл суреттен кімдердің суретін көріп тұрсыңдар. (Слайд арқылы отбасы мүшелерінің суреттері көрсетіледі)

Дидактикалық ойын: «Отбасы мүшелерін ретімен орналастыр»

Мақсаты: Отбасындағы мүшелердің атын атап, жасырынған отбасы мүшесін табу.

Шарты: балаларға отбасы мүшелері бейнеленген үлестірмелі материалдар ұсынылады. Оларды қарандаш көмегімен ретімен орналастырады.

Сергіту сәті:

Атамның алып күрегін,

Ауланың қарын күредім.

Әжеме мен құдықтан,

Су әкеліп беремін.

Еденді де жуамын,

Шаң-тозаңды қуамын.

( балалар қимыл-қозғалыс арқылы орындайды)

Шығармашылық жұмыс: «Тақия»

Тәрбиеші: - Балалар, қараңыздаршы мына суретте әжеміздің немересі тақиясын жоғалтып алыпты. Бізден көмек сұрап отыр. Біз әжеге тақия жасауға көмектесемізбе?

Балалар: -иә

(балалар алдын ала дайындалған материалдардан тақияны жапсырады)

Ойын сұрақ: «Көңілді доп»

-Отбасындағы ең үлкен адам?

-Кімді жақсы көресің?

-Отбасы мүшелерін ата?

-Анаңа қалай көмектесесің?

-Үйде қанша адам тұрасыңдар?

-Үйге қонақ келгенін жақсы көресің бе?

Мақал-мәтелдер:

-Үлкенге әрдайым сәлем бер.

- Үлкенге қарсы шықпа.

- Үлкеннің батасын қабыл ал.

- Ауылыңда қария болса,

Жазып қойған хатпен тең.

- Кәрі, кәрінің сөзі-дәрі.

- Ақылды қария-ағып жатқан дария.

Іс-әректеттің бағалау кезеңі:

Қорытындылау

-Бүгінгі оқу іс-әрекеті сіздерге несімен ұнады?

-Отбасы мүшелерін тағы бір қайталап өтейікші?

-Қандай тапсырма сіздерге қызықты болды?

-Балалар, әрқашан үлкендерді ардақтап өтейік. Оларды сыйлап, қадірлейік. Ендеше, балалар сіздерде адал, мейірімді, қайырымды азаматтар мен азаматшалар болып өсіңдер. Үлкендер алдында әр кез бас иіп жүріңіздер!

Күтілетін нәтиже:

Нені біледі: 1-қазан қарттар күнін, отбасы мүшелерін; өзінің отбасы, жақсы көретін адамдары, жақсылық пен қайырымдылықты, ата-аналарының қамқорлығы туралы түсіндіру;

Қандай түсініктерді игерді: отбасы мүшелерін ажырата алады;

Меңгерген дағдылары мен іскерліктері: ата-аналарын сыйлауды, адамгершілік қасиеттерін , әдептілік қарым-қатынас мәдениеті мен сыпайылыққа қатысты сөздерді.