"Балабақша тәрбиесі"

Балабақша тәрбиесі

Бала-ел байлығы, қоғам бақыты. Баланың балабақшадан жақсы тәлім-тәрбие алғанын қалаймын, аянбай сол үшін де еңбек етемін. Еркіндікке жол беремін. Баланың еркін сезінуі оның бәрін білуге деген талпынысы мен құлшынысы.Баламен ойнасаң дүние сырының кілті іздемей-ақ табылады, өз атын еркін айтады, бала жүрегінен орын аласың. Бала тәрбиесінде заманауи технологияларды қолдануда белсенділік пен шығармашылық ізденіс дамиды. Баланың білімге деген құлшынысын арттырасың. Дамыта оқыту, жеке бағдарлы оқыту, проблемалап оқыту, денсаулық сақтау технологиясымен жүргізер жұмысың баланы оқыту мен тәрбиелеудегі жүйелі атқарылатын жұмыс кешені болып табылады. Тәрбиеленуші бүлдіршінді күннің шұғыласына, судың тұнығуына, жаңбырдың мөлдір тамшысына, айдың нұрына, желдің самал лебіне, жайқалған әсем гүлдерге және кемпірқосақтың алуан-алуан түстеріне теңеймін, шын ниетім, себебі жетер жетістігімде баланың арқасы.Қазіргі таңда кез келген жанұяда күн көріс қамымен –ата-аналар таң атқаннан қара кешке дейін жұмыста. Оған себеп өте көп. Ең алдымен қымбатшылық қара бұлттай қаптап тұрғаны бар, тағы бір себебі баланың жағдайын жасау, отбасын асырау. Осы орайда «Балабақша» қолайлы, таңертеңнен кешке дейін бала сақтық ортасында.  Балабақшада бала ең алдымен – күн тәртібіне үйренеді. Уақытылы таңғы ас ішу, ұйымдастырылған оқу қызметімен танысу, ойын ойнау, серуенге шығу, сауықтыру шараларын  жасау, түскі ас ішу, ұйықтау , жаттығу жасау сияқты. Балабақшадағы  тәрбиешінің  рөлі- ата-анадан кейінгі екінші орында. Тәрбиеші  балаларға қандай тәрбие бере алады деген сауалдарға жауап берсем?  Ең алдымен  үйде еркін өскен балаға – тәртіппен отыруды, сұраққа жауап беруді, қабілетін дамытуды, сурет салуды, ән айтуды, бір-бірімен сыпайы ойнауды, санауды үйренеді.  Сұрақ қойылғанда жылап не айтарын білмеген мінезі қиын балаларды бірте-бірте ашылып бала жақсы жағына өзгере бастайды. Баланы  жақсы тәрбиелеу  үшін- ата-анамен тәрбиеші бірлесе жұмыс жасау қажет. Ата-ана тәрбиешіге, тәрбиеші ата-анаға сену қате пікір. Баланың болашағы жақсы, мықты қаланған фундаментке байланысты. Бала жастайынан тілді меңгеруі қажет, өз ойын жеткізе білуі керек, балалармен жақсы қарым-қатынасты болуды, білімді, ақылды болып өсуі заманның талабына айналды. Тәрбиеші бала тәрбиелеу үшін ең алдымен – өзі ана болу керек деген ұстанымдамын. Себебі ана болған соң жүрегің мейірімге толы болып тұрады. Балаға бар білгенімді үйретсем, тәрбиелесем, жақсы тұлға болып қалыптасуына бір тамшы судай үлес қосудың өзі қандай бақыт.Тәрбиеші ең алдымен-мектепке дейінгі баланы тәрбиелеуші. Адамгершілік саналығы биік ата-ананың отбасы мүшелерінің бір-бірімен сырласуы, қолдасуы, көмегі, татулығымен ынтымағы бір-біріне талап қоя білуі әрқашан әділ болуы, білікті, іскер азаматтар өсіп шығады. Міне бақытты отбасының формуласы. Әке де анада, тәрбиешіде –болашақта мықты, өз-өзіне сенімді азамат пен азаматшалар тәрбиелеуші тұлғалар.  «Ұлы бар үйде қуат бар, қызы бар үйде шуақ бар»  -деген астарлы сөздермен өз ойымды түйіндесем. Өміріңізге мән беретін, үйіңізге сән кіргізетін, көңілге нұр құятын, жүрегіңізге мейірім сыйлайтын бауыр етіңіз балапандарың аман болсын, ғұмырлы болсын, білімді, ақылды болып өссін. Бал татыған балдырғандар болашағы – өз қолымызда.

БАЛА – бақыт,

БАЛА – қуаныш,

БАЛА – шаттық,

БАЛА - мақтаныш. 

Баланы өсіріңіз- баланы мақтаңыз, балаға шабыт сыйлаңыз- баланы үнемі ойлаңыз. Себебі мәртебеңізді көтеретінде, түсіретінде бала. Сұрағына жауап беріңіз, күнінің қалай өткенін сұраңыз. Не үйренгенін, балабақшада не жасағанын  сұраңыз, Мақтаңыз, мадақтаңыз бала өзінің еңсесін көтерсін.

Бала балабақша, тәрбиешісіне қарай асықса, бала – балабақша сәні, тәрбиеші – балабақша айнасы болары анық. Балабақша сатысында тәрбиеші баланың бір анасы болып саналады. Бала үшін алаңдап, әр кез көз алдында өсіп келе жатқан бүлдіршінмен бірге қуана, мұңая білетін жандар. Бала мен балаша қуанатын осы – тәрбиеші. Себебі бала – біздің болашағымыз. Олар өмірдің сәні, әлемнің жарық нұры!  Менің негізгі мақсатым – балаларға жақсы көңіл-күй сыйлай отырып, саналы тәрбие, сапалы білім беру. Өзімді әр оқу іс-әрекеті үстінде балаларға бақыт беруші, жол сілтеуші рөліне қоямын. Сөзімді қорыта келе, бүгінгі тәрбиеші –өз мамандығын сүйетін, патриот, өз ісінің шебері, ізденімпаз, жаңашыл, терең болуы тиіс. Жеке тұлға ретінде ізденгіш, өз пікірін айта алатын, адамгершілігі мол, білімді, өз елін сүйетін, оң қолынан өнер тамған маман болуы керек.

Көкшетау қаласы

әкімдігінің жанындағы

МКҚК №10 «Алтын бала» бала бақшасының

тәрбиешісі А.Д Жанайдарова