Конспект урока в 7 классе с применением ИКТ

Урок мунöм.

1. Оргмомент.

Видза оланныд, ёртъяс! Талун коми кыв урок дырйи ми кутам водзö восьлавны выль тöдöмлунъясла. Вайöй нюмъёвтам ёрта- ёртлы да сиам став бурсö.

1. Тöдöмлунъяс актуализируйтöм.

Тöдмалам кроссворд. Кутшöм кывсикасъяс татчö дзебсьöмаöсь.

Мог: Прöверитны тöдöмлунъяс велöдöм кывсикасъяс йылысь. (Слайд 5):

1. Асшöр кывсикас, петкöдлö предметлысь лыдсö, налысь пöрадоксö.

2. Асшöр кывсикас, вежö сёрниын эмакыв, кывберд да лыдакыв.

3. Асшöр кывсикас, петкöдлö предмет ним.

4. Асшöр кывсикас, петкöдлö предметлысь признак.

5. Асшöр кывсикас, петкöдлö предметлысь действие.

3. Велöдан проблема пуктöм.

Лыддьöй шусьöгъяссö, гöгöрвоöдöй да тöдмалöй кывсикасъяссö. (Слайд 6):

Кывсö ньылыштöмöн олö.

Виччысигад кадыд дыр кыссьö.

Петук сьывтöг асылыд воас.

Мунігад кок пыдöсыд пым.

Паччöртö пöжигад кынöмыд оз пöт.

Йöзлысь шогтö мунігмоз шогалан.

- Кутшöм кывсикасъяс эн тöдмалöй?

(ньылыштöмöн, виччысигад, сьывтöг, мунігад, пöжигад, мунігмоз). Мыйла? (Вочавидзö кыдзи? кор?юалöм вылö. Суффиксыс мöд). Кутшöм кывсикасöн лоö тайö кывйыс? (Ог тöдöй).

Тема ?

Кыдзи ті чайтаныд, кутшöм талунъя уроклöн темаыс? Тöтмалöй ребус.

(Слайд 7): ногакыв

Челядь сувтöдöны мог.

- Мыйын лои мытшöдыс? (Öта-мöдкöд диалогын тöдчöдöны, мый, вöлöмкö, оз тöдны, мый сэтшöм ногакыв). Сідзкö, могöн лоö тöдмасьны ногакыв кывсикаскöд.

Велöдчысь пуктö челядьлы урок кежлö могъяс: (Слайд 8):

• Лыддьыны 23 § да 24§.

• Тöдмавны ногакывлысь вежöртассö да грамматикаын тöдчанлунсö.

• Гöгöрвоöдны ногакывлысь артмöм.

• Кужны аддзыны текстысь ногакывъяс да вöдитчыны наöн.

• Тöдчöдны ногакывлысь коланлун сёрниын.

• Велöдны правилö.

4. Выль тема гöгöрвоöдöм.

Аддзöй ковтöм кыв. (Слайд 9):

• Шонтысьны, горзігтыр, повны, ворсны

• Котöртысь, кöдзтöм, öшöдöмöн, кыйтöм

Кутшöм признакъяс серти торйöдінныд ногакывсö?

Буско легöдіс бöжнас, радлöмöн увтышталіс. (Слайд 10):

• Лыддьöй сёрникузясö.

• Сувтöдöй юалöмъяс.

• Мöвпыштöй, кутшöм кывъяс петкöдлöны: а)асшöр действие; б)содтöд действие

• Тöдмалöй, кутшöм суффикс отсöгöн артмöма ногакывйыс.

Шойччыштам (физминутка)

Кияс кутам ЛЭДЗӦМӦН,

Пельпомъяссö ЛЭПТӦМӦН,

Шуйга вылö КОПЫРТЧАМӦЙ,

Веськыд вылö КОПЫРТЧАМӦЙ,

Юрöн кытшов ВӦЧЫШТАМӦЙ,

Киöн ёртлы ШЕНЫШТАМӦЙ,

Сынöд пыді ЛОЛЫШТАМӦЙ.

ШОЙЧЧЫШТіМ ми неуна,

УДЖАЛЫШТАМ и водзö на!

Уджалам группаясöн. (Велöдчысьяс юксьöны группаяс вылö. Уськöдöны тöд вылö, кыдзи колö уджавны группаын).

1 группалы удж:

• гöгöрвоöдны ногакывлысь вежöртассö;

• тöдмавны, кутшöм кывкöд йитчö ногакывйыс;

• кутшöм юалöм вылö вочавидзö ногакывйыс;

• пыртны таблицаö.

2 группалы удж:

• Гöгöрвоöдны, кыдзи артмöма ногакывйыс;

• Торйöдны, кутшöм суффиксъяс отсöгöн артмöны суффиксъяс;

• пыртны таблицаö.

1 группалы карточка

• Вына тöв гартіс ас гöгöрыс лым столб...яс, омлялöмöн нуис найöс водзö.(И.Коданёв)

• Сувтовкерöмöн видзöдыштіс дедушыс лöня варовитысь с…öд визув вылö.(В.Торопов)

•  Чорыда шпорö…чöмöн кыпöдчис кутшöмкö л…бач. (В.Торопов)

2 группалы карточка

• Тöлыс локтіс тэрмасьöмöн, ассьыс уджсö вöчис зіля, нюжмасьтöг.(С.Раевский)

• Кыдз ру коръяс усигас ёна шарöдчисны. (С.Раевский)

• Кынмалігöн нин вöв кызь йöртісны пыш му йöрö. (В.Торопов)

5.Материал вынсьöдöм.

Пыртам тіянлысь выль тöдöмлунъяс кластерö. (Велöдчысьяс öтвылысь дасьтöны кластер).

- Кужам-ö вöдитчыны тöдöмлунъясöн?

6. Асшöр удж.

Лыддьöй шусьöгъяссö. Бöрйöй да гижöй ногакывъяссö, пасйöй налысь суффиксъяссö.

• Панясигад удзöдö, уджалігад видзöдö.

• Быдсяма юква панявны лоö олігад.

• Сьöкыдторсö аддзывтöг кокнисö он тöдмав.

• Мудз мортыд тай узигад кулöма кодь.

• Дыр узигад йöв-выйыд оз сод.

Мöвпыштöй, кутшöм мог кутöны йöз сёрниын шусьöгъяс. Гöгöрвоöдöй шусьöгъяслысь вежртассö.

Прöверитам асьнымöс.

7. Рефлексия.

• Ме тöдмалі…

• ме велалі…

• меным кажитчис…

• Вöлі сьöкыд…

• Ме кöсъя…

8. Гортса удж.

Гортса удж бöрйöм серти:

- лöсьöдны «Ёртлы письмö», пыртны гижöдö ногакывъяс(≈10 сёрникузя) оценка «5»

- аддзыны художествоа гижöдысь 7-8 сёрникузя, кöні паныдасьöны ногакывъяс оценка «4»

- 198 удж. Бöрйыны да гижны кадакывъяссö на дорö йитчысь ногакывъяскöд, торйöдны суффиксъяс. оценка «3»