Удмуртский обряд "Пинал пыртон"

Цель: пычатон вордскем шаердэ гажан мылкыд удмурт калыклэн йылол-сямъесыныз тодматскон пыр.

Ужпумъёс:

Пумиськыны но юалляськыны пересьесын.

Тодматскыны пинал пыртон обрядэн.

Дышетыны удмурт кырзанъесты, эктонэз.

Возьматыны Пинал пыртон сямлэн туала улонын кутиськемез

Удмурт корка: тодьы жоккышетэн шобыртэм жок вылын нянь, сылал понэмын скамья, гур, кокы.

Скамья вылын пуке анай, пиналзэ возе но нуны веттан гур кырза:

Чагыр, чагыр, дыдыке,

Малы пыддэ жобаськод?

Чебер пие, гыдыке,

Малы ялан бӧрдӥськод?

Изь, изь, нуные,

Зарни бугоре.

Пыре нылаш но кутске кокыез веттаны.

Анай: Буш кокыез эн ветта! Пересьес шуылизы, шайтан, пе, веттаське. Пиналэз но огназ кельтыны уг яра. Коркакузе медаз вошты. Соин ик миндэр улын качы понэмын...

Пыре пересь.

Пересь: Я, умме усиз. Жок вылэ но каллен волдыны кулэ ни.

Пуктэ жок вылэ жук но восяське:

Осто Инмаре, Куазе, Кылдысинэ. Та жок вылэ пуктэм тыр жукеныд, тыныд осто карисько. Тау тыныд выль муртэд понна! Та выль пидэ зеч шудбуро, улоно-вылоно, паськыт шудо, кузь арлыдо мед луоз!

Портэм сион-юонэз пукто.

Анай: Шаньги но пыжи, перепеч но, сур но вуиз.

Пересь: Одно ик жук но выль шуккем вой жок вылын кулэ луыны.

Анай: Я, калык но лыктоз ни ай.

Пересь: Син медаз усь, суэн кымесаз кирос пуктыны кулэ. Лякыт адями но син уськытыны быгатэ.

Нылаш: Син усез ке, мар кароно?

Пересь: Соку пересьес ос кутэтэз кезьыт вуэн гылтылизы но, нунылэсь бамзэ пылатылизы.

Йыгаськем куара кылиське. Сиенэн-юонэн куноос пыро но гур борды кутскыло.

Куноос:

-Пырыны луоз-а?

-Зеч ивор кылимы!

-Кунояны лыктимы!

-Пичи дыдылы саламъёс ваимы!

Анай но пересь кырзало:

Кызьы меда лыктиды, зечесь-а ти вуиды?

Чупчи йылысен-а, выжыысен-а?

Гажаса-а гажатэк-а лыктиды?

Монэ адзем потыса-а вуиды?

Куноос кырзало:

Кинъёс, кинъёс, кинъёс, кинъёс лыктиллям?

Ватка нылъёс, Ватка нылъёс, лыктиллям.

Кыти, кыти, кыти, кыти лыктиллям?

Чупчи кузя, Чупчи кузя лыктиллям.

Пересь: Гажано куноос, ойдолэ жок сьоры пуксеме.

Куноос жок сьоры пуксе, кузеос соосты куноято:

Куноос:

- Калягаен пирожкиме но шомъялэ

- Нош мон перепеч пыжыса ваи.

- Кума, картошкаен шаньгиед туж удалтэм!

- Сурды но туж ческыт!

Ваньзы кырзало:

Пиё пиё коркае но,

Соин шулдыр коркае.

Ныло, ныло коркае но,

Соин шулдыр коркае.

Садо, садо азбаре но,

Соин шулдыр азбаре.

Мако, мако бакчае но,

Соин шулдыр бакчае.

Пересь: Пичи дыдылы кирос мам но кирос пап кулэ!

Жок вамен анай пиналзэ сетэ кирос атаезлы. Со кузьым вылэ пиналэз кыласа-бураса басьтэ:

Киросатай: Таза но визьмо буды!

Кирос анаезлы сетэ кузьымен. Кирос анай кузьым вылэ пиналэз кыласа-бураса басьтэ:

Киросанай: Анай-атайдэ кылзиськы!

Анаезлы кузьымен пиналэз сето.

Пересь: Табере, куноос, вой сиёме!

Куноос кыласа-бураса вой тарелка доры поно:

Куноос:

-Зок мед будоз!

-Тазалыкез мед луоз!

-Чебер мед луоз!

- Армие мыныны мед яралоз!

-Ужась мед луоз!

- Шудбурез мед луоз!

Пересь: Я, шулдыръяськоно ни!

Экто «Тямысэн эктон»